سوال: اگر امام درود کے بعد بلا عذر دعا ماثورہ نہ پڑھے اور سلام پھیر دے زید کہتا ہے کہ امام کو اسکے لیے مقتدی کی اجازت لینا ضروری ہے اگر مقتدی کے اجازت کے بغیر کیا تو ایسا کرنا امام کے لئے مکروہ تحریمی ہے؟
(١) کیا بلا عذر ایسا کرنا امام کے لئے مکروہ تحریمی ہے جب زیادہ مقتدی اس پر راضی نہ ہو؟
(٢) کیا بلا عذر ایسا کرنا امام کے لئے مکروہ تحریمی ہے جب زیادہ مقتدی اس پر راضی ہو؟
(٣) اگر تراویح میں جلدی کے لئے ایسا کرے اور زیادہ مقتدی اس پر راضی نہ ہو؟
(٤) اگر تراویح میں جلدی کے لئے ایسا کرے اور زیادہ مقتدی اس پر راضی ہو؟

(1 تا 4) قعدہ اخیرہ میں درود شریف کے بعد دعائے ماثورہ کا پڑھنا مسنون ہے؛ اس لیے امام کا بلاعذر اس کے ترک کی عادت بنا لینا صحیح نہیں۔ امام کو چاہیے کہ فرائض و تراویح میں بھی دعائے ماثورہ کے پڑھنے کا اہتمام کرے؛ تاہم اگر امام تراویح میں مقتدیوں کی عجلت و ناگواری کو محسوس کرے اور ان کی رعایت میں بسااوقات دعائے ماثوارہ پڑھنا ترک کردے تو اس کی گنجائش ہوگی‏، اور اس صورت میں بھی بہتر ہوگا کہ کم از کم کوئی مختصر دعا جیسے: اللہم اغفرلی وغیرہ پڑھ لے۔